Mér finnst rigningin góð

Í vorverkunum í garðinum:

Bæn garðyrkjumannsins

Ó himnafaðir, sendu okkur nú dálítið regn á hverjum degi. Til dæmis frá lágnætti og fram um óttu, en mundu að það verður að vera hægt og milt regn, sem síast jafnt að rótum plantnanna. Láttu þó ekki rigna á glitbera, skrautnál, sólfífil, lafvendil og öll hin blómin, sem þú veist af alvisku þinni að ekki þola mikla vætu - ég skal skrifa þau helstu upp á blað, ef þú vilt.

Láttu svo sólina skína á jörðina á daginn, en þó ekki alls staðar jafnt, til dæmis ekki á kvistina, maríuvendina, kínaliljurnar og alparósirnar, sem þú veist að kunna best nokkrum raka í loftinu og dögg á nóttunni, en hvassviðri má alls ekki koma.

Gefðu að mikið verði af ánamöðkum, en alls engar blaðlýs og sniglar og ekki heldur mygla. Mætti svo falla frá himnum, svo sem einu sinni í viku, þunnt mykjuvatn eða fulgladrit.

Amen.

Þetta unga fólk nú til dags

Unglingar nú á dögum sýna enga kurteisi, hnussaði í eldri manni í strætisvagni.

Mér finnst að þú eigir ekki að ergja þig yfir þessu, sagði maðurinn við hlið hans í vagninum.  Stóð ekki ungur maður upp fyrir þér þegar þú komst inn í vagninn svo þú gætir setið makindarlega alla leiðina ?

Jú, að vísu, sagði sá óánægði,- en konan mín varð að standa.

Erkifjendur sænga

Ég starfaði hjá spænska flugfélaginu Iberia í 3 ár   ...í gamla daga. 

Í fréttinni hér neðantil er fjallað um að Breska flugfélagið British Airways og Iberia hafi gert samkomulag um samruna. Tilgangurinn er að stofna flugfélag sem verði í forystu í Evrópu.

Mér varð hugsað til míns Iberia-tíma einmitt nýverið þegar ég fór í gegnum gamlar myndir. Það átti að heita tiltekt og flokkun til undirbúnings fyrir skönnun og enn betri vistun. Skókassar hafa hingað til verið mín myndageymsla. Konan var sem sagt að ljúka enn einu ljósmyndanámskeiðinu í vetur og uppátækið sjálfsagt framhald af því. Lítið varð reyndar úr verki því margt skemmtilegt valt upp úr skókössunum sem gaman var að staldra við og rifja upp. Sumt hafði ég ekki skoðað í fjölda ára. Þar á meðal voru myndir frá "ferðaþjónustutímabili" lífs míns.

Ríkisstyrkt flugfélög voru lengi vel eins konar þjóðartákn, skrautfjöður eða óskabörn þeirra þjóða sem þau tilheyrðu.  Sabena, Swissair, Austrian Airlines, Alitalia, Olympic Airways, Iberia, SAS, British Airways, Air France, Lufthansa. Maður hélt þessa glæsilegu ósigrandi fáka háloftanna verða til staðar að eilífu eða þar um bil. :)

Miklar sviptingar í resktri flugfélaga hafa orðið síðustu 10 - 15 árin. Amerísku flugfélögin byrjuðu mun fyrr en þau evrópsku að sameinast/yfirtaka hvert annað til hagræðingar í rekstri. Líklega voru það ríkisstyrktu flugfélögin í Evrópu sem síðust lögðu upp laupana gegn sífellt harðara samkeppnisumhverfi, lægri fargjöldum og hærra olíuverði. (Ekki voru það launagreiðslur starfsmanna sem sliguðu reksturinn frekar en nú er í ferðaþjónustu). Ríkiskassar ýmissa landa hafa staðið undir margbreytilegum rekstri... 

Á MÍNUM Iberia árum hefði samruni með öðru félagi og allrasíst því breska þótt algjörlega óhugsandi. VIÐ (Iberia) vorum þjóðarsál Spánar fannst okkur. Tjallinn hefur jú ekki verið Evrópubúi no 1 á visældalistum spánverja.

En, svona getur neyðin kennt  - stundum.

BA og Iberia í eina sæng

Heiðarlegt innlegg

Að gangast við mistökum og sjá sína eigin ábyrgð, er stórmannlegt.

Ingibjörg Sólrún á þakkir skildar fyrir sitt heiðarlega innlegg í það uppgjör sem nú er framundan. 

„Mér finnst ég hafa brugðist“

Leshringurinn tekur sumarfrí

Sæl öll.

Harmur englanna eftir Jón Kalman Stefánsson var síðasta bókin sem hópurinn tekur fyrir sameiginlega í vetur.

Sjálf ætla ég næst að lesa Sumarið og svo kemur nóttin eftir þennan sama höfund. Hrönn var að mæla með þeirri bók. Bókmenntaverðlaunin fékk hún á sínum tíma en meðmæli Hrannar vega þyngra á mínum kaliber.

Við byrjum svo aftur í haust og ég held áfram..., mun senda á ykkur email þegar þar að kemur, til að hnippa í þá sem vonandi vilja vera með.

Takk fyrir áhugaverð og frábær samskipti í vetur.

Njótið sumarsins.

Komdu til baka - Kristmundur Axel stoltur Kristmundsson

Vorið er komið

Krókusarnir eru komnir upp í garðinum heima hjá mér og brosa til heimsins.

Heiðlóan er komin til Vestfjarða, í fyrradag sáust nokkrar í Önundarfirði og í Dýrafirði.

Þrátt fyrir allt og alllt....,

þá er allvega vorið komið og við getum öll glaðst yfir því.  

Lóan komin til Vestfjarða

Gerpla fær nýjan sess - gott leikhús

Gerpla eftir Halldór Kiljan Laxnes er nú í fyrsta sinn í leikhúsi. Þetta meistaraverk Nóbelskáldsins hefur aldrei áður verið sett á svið. 

Sagan gerist á mínum æskuslóðum. Sem unglingur var ég látin lesa Gerplu í skóla. Ég hóf lesturinn af áhuga sem dvínaði fljótt. Harmsaga vonleysis og vondra örlaga náði ekki að fanga huga unglingsins. Snilld höfundarins og málfarið sem honum tókst að skapa fór fyrir ofan garð og neðan hjá krakkagerpinu. 

Nú hefur Gerpla öðlast alveg nýjan sess!  Ég fór að sjá sýningu Þjóðleikhússins á dögunum og naut virkilega góðs leikhúskvölds. 

Mig langar til að mæla eindregið með sýningunni.   

Rangsnúin hetjuharmsaga

Gerpla kom út árið 1952. Sagan gerist á 11. öld þegar tveir vestfirskir garpar sverjast í fóstbræðralag að fornum sið. Þorgeir Hávarsson er vígreifur kappi sem vill heldur herja en hokra. "Hann brosti því aðeins að honum væri víg í hug ellegar nokkurt annað stórvirki". Þormóður Bessason er hæglátt skáld sem ann konum og hetjum meir; meðan hann situr heima í friði fer Þorgeir í víking og finnur sér kóng að berjast fyrir en lætur að lokum líf sitt. Þá er skáldið skyldugt að halda af stað og hefna fóstbróður síns og yrkja kóngi hans dýr kvæði.

Gerplu má kalla rangsnúna hetjuharmsögu. Hún er í sögualdarstíl en hetjurnar fallnar af stalli. Sagan er margræð og beitt háðsádeila á stríðsrekstur og hetjudýrkun að fornu og nýju – en ekki síður á þá sem fylgja í blindni leiðtoga eða hugsjón og fórna allri mennsku fyrir ímyndaða dýrð.

Einvala lið

Leikgerðin er í höndum Baltasar Kormáks og Ólafs Egils Egilssonar, unnin í samvinnu við það einvala lið sem leikhópurinn er!  

Baltasar Kormákur hefur á undanförnum árum sett upp frábærar sýningar í Þjóðleikhúsinu. Þar hefur hann tekið vinsæl og virt skáldverk, hrist upp í þeim á skemmtilegan hátt og laðað fram það besta úr hverju verki. Útkoman er yfirleitt frumleg og ögrandi túlkun. 

Hópnum hefur tekist að gera þessa sýningu í senn sprellfjöruga og bráðfyndna á köflum. Hér er hörð ofbeldis- og stríðsádeila, óvægið uppgjör við hetjudýrkun og mikilmennskuhugmyndir á öllum tímum. 

Í hlutverkum  

Með hlutverk fóstbræðranna Þorgeirs Hávarssonar og Þormóðs Kolbrúnarskálds fara tveir þekktir leikarar af yngri kynslóðinni, þeir Jóhannes Haukur Jóhannesson og Björn Thors. Einn af mínum uppáhaldsleikurum Ólafur Darri Ólafsson er ekki síður þungamiðja í sýningunni og ber hana uppi ásamt Ilmi Kristjánsdóttur og Ólafíu Hrönn. Öll eiga þau frábæran leik. Mér þótti líka gaman að sjá glænýtt og efnilegt fólk..., Stefán Hall Stefánsson.

Vel valin tónlist

Í sýningunni flytur leikhópurinn nokkur þekkt sönglög sem eru skemmtilega valin og passa inn í sýninguna eins og þau hafi aldrei verið samin af öðru tilefni :) Ég er kominn heim eftir Kalmann sem er eitt af mínum uppáhalds sönglögum, Stuðmannalagið Íslenskir karlmenn, Pínulítill kall  -Þursaflokkurinn og Stolt siglir fleyið mitt eftir Gylfa Ægisson.

Búningar og sviðsmynd,  frumleg og listræn upplifun

Samspil búningahönnunar Helgu I Stefánsdóttur og leikmynd Grétars Reynissonar er frumleg og listræn upplifun sem lyftir sýningunni um mörg þrep.