Mávurinn: Jónatan, hvað er til ráða

Í hádeginu var ég stödd við Reykjavíkurtjörn. Við mér blasti mikið breytt fuglalíf frá því sem áður var. Æðakollurnar héldu sig til hlés úti við hólmann á miðri Tjörninni. Sárafáar grágæsir voru uppi á bakkanum hjá okkur mannfólkinu. Virðulegar í fasi horfðu þær yfir Tjörnina og nánasta umhverfi hennar og sögðu fátt.  Við bakkan þar sem helst var mat að hafa var URMULL af mávum. Tjörnin er bókstaflega yfirfull af þeim! Heilu flokkarnir görguðu þar og slógust af mikilli grimmd um hvern brauðbita sem féll í vatnið. 

Þeir fullorðnu sem þarna voru með börnin sín völdu að gefa brauð sjálfir frekar en að leyfa mávinum að glefsa eftir litlum höndum barna sinna.  Skynsöm smábörnin voru dálítið hrædd við þessa háværu, grimmu og freku fugla  - enda full ástæða til.

Annarsstaðar í borgarlandinu er svipað ástatt eins og við Tjörnina. Mávarnir eru orðnir alltof margir inn til lands. Þeir éta þá fæðu sem minni fuglar eru vanir að hafa aðgang að. Sennilega er fjölgun máva vegna þess að fæða hans í sjó hefur brugðist. 

Á vef Reykjavíkurborgar eru borgarbúar hvattir til að draga úr óbeinum matargjöfum, með tryggum frágangi á matarleifum og með því að draga úr brauðgjöfum á Tjörninni á sumrin. Önnur ráð en þessi virðast borgaryfirvöld ekki hafa.

Ólöf Arnalds

Vandaður vefur: Tímarit.is

Hluta af sögu okkar og menningararfi er að finna í blöðum og tímaritum frá fyrri árum allt til dagsins í dag.    

Vefurinn Tímarit.is er stafrænt bókasafn sem veitir aðgang að milljónum myndaðra blaðsíðna, pistla og frétta úr blöðum og tímaritum. Aðgangur er öllum opinn.  Notendur geta leitað að efni á ýmsan hátt, eftir löndum og titlum, höfundarnafni eða nafni viðmælenda þegar um viðtöl er að ræða, eða að völdu orði í öllum texta. Einnig er hægt að blaða í gegnum efnið og prenta út valdar blaðsíður.   

Tímarit.is er samstarfsverkefni Landsbókasafns Íslands - Háskólabókasafns og færeysku og grænlensku landsbókasafnanna. Jafnt og þétt er efni bætt við. Elsta tímaritið í safninu er Alþingistíðindi sem kom út 1696-1697.

Lúpínan: Skógrækt ríkisins leggst eindregið gegn boðaðri útrýmingarherferð

Skógrækt ríkisins hefur sent umhverfisráðherra greinargerð, þar sem eindregið er lagst gegn boðaðri útrýmingarherferð gegn lúpínunni. 

Jón Loftsson skógræktarstjóri: "Við höfnum þessu öllu saman á þeim grunni sem það er sett fram á. [...] Grunnurinn að þessum tillögum er sá að líffræðilegri fjölbreytni stafi hætta af lúpínunni. Við teljum það alrangt. Við teljum að gera þurfi miklu ítarlegri úttekt og rannsóknir á lúpínunni, áður en menn fara af stað í einhverja herferð, ég tala nú ekki um einhvern eiturefnahernað, gegn henni. Fullyrt er að hún vaði yfir gróið land. Hvar gerir hún það? Það eru ekki til neinar rannsóknir, sem byggja má á hvort og þá hvar hún er að gera skaða."

Mín tilfinning er sú að við Íslendingar séum nokkuð gjörn á afdráttarleysi. Með eða á móti, svart eða hvítt skal það vera og helst ekkert þar á milli. Við höfum ekki tíma fyrir umræðu og kynningarstarfsemi til almennings byggða á rannsóknum. Enda höfum við ekki heldur tíma til að rannsaka! Þetta hefur sýnt sig í fleiri málefnum en þegar vinkona mín Lúpínan á í hlut..., ég nefni sem dæmi ESB!

Ég vil benda lesendum á vandaða grein Ólafs Stephensen (ef þið hafið misst af henni) sem hann birti fyrir nokkru, "Bótanískt útlendingahatur".   Greinin fylgir hér:

Sömuleiðis hefur bloggvinur minn og leshringsfélagi Ágúst H. Bjarnason skrifað mjög athyglisverða umfjöllun á bloggsíðu sinni um Lúpínuna (sjá hér og hér). 

Magnús Guðmundsson: Drápa

Aldeyjarfoss - einstök náttúruperla á Norðurlandi

Á ferð um Norðurland í sumar fór ég að skoða einstaka náttúruperlu sem ég hef ekki heimsótt fyrr á ævinni. Ég varð alveg heilluð af þessum gullfallega stað.

 

Aldeyjarfoss er í Skjálfandafljóti í botni Bárðardals og markar upphafið á Sprengisandsleið að norðanverðu. Fossinn ber nafn sitt af Aldey sem er eyja í Skjálfandafljóti skammt frá fossinum.

Aldeyjarfoss er án efa einn af sérstæðustu fossum á Íslandi. Hann fellur fram af stuðlabergshömrum niður í stóran hyl. Í kring um hann í gljúfrinu eru háar og fallegar súluraðir úr ferstrendu og sexstrendu stuðlabergi. Hvítur litur jökulfljótsins myndar skemmtilega andstæðu við dökkt bergið. Fossinn er um 20 metra hár.

 

Það tekur um það bil 15 mínútur að aka til Aldeyjarfoss frá Kiðagili. Ekið er suður Bárðardal að vestan og þegar komið er að innstu bæjunum Bólstað og Mýri er beygt inn á Sprengisandsleið smá spöl og beygt síðan til vinstri á afleggjara að fossinum.

Einnig er hægt að koma að Aldeyjarfossi austan við Skjálfandafljót gangandi úr Stórutungu. Vel fólksbílafært er að fossinum. Á bílastæðinu við fossinn er salernisaðstaða. Frá bílastæðinu er svo örstutt ganga að fossinum sjálfum eftir göngustíg sem liggur niður bratta brekku. 

Evrópusinnar hægri og vinstri

Evrópusinnar eru í öllum stjórnmálaflokkum - og utan þeirra.

Umburðarlyndi er flestum til framdráttar - líka stjórnmálaflokkum.

Í kjölfar landsfundar Sjálfstæðisflokksins um helgina er almenningi birt ályktun þar sem einarðri andstöðu flokksins í Evrópumálunum eru gerð skil. Þessi afstaða flokksins mun klárlega kosta enn meira fylgishrun en það sem varð í síðustu alþingiskosningum og þótti mörgum nóg um. 

Þar sem mismunandi sjónarmið ekki rúmast þar ríkir þröngt sérhagsmunamat. Þar getur breiðfylking ekki þrifist. Sjálfstæðisflokkurinn hefur hingað til skilgreint sig sem lýðræðislega sinnaðan umbótaflokk. Það er sorglegt að sjónarmið Evrópusinna fái ekki rúm í flokksstarfinu og að engin málamiðlun sé gerð.

Á almennum vettvangi hefur mikið verið gefið út af yfirlýsingum um evrópumálin. Oft hafa þær yfirlýsingar byggst á tilfinningasemi fremur en rökum. 

Staðreyndir eru hins vegar þessar: ESB hefur nú þegar samþykkt aðildarviðræður við Ísland. Það var gert fyrir rúmri viku síðan, þann 17.júní. Viðræðuferlið er því  í raun hafið. Á meðan Sjálfstæðisflokkurinn er ekki við völd er þessi ályktun frá flokknum bara stormur í vatnsglasi. Á meðan flokkurinn á ekki aðild að ríkisstjórn er hann ekki í aðstöðu til að breyta stefnu hennar. Umsóknin verður ekki dregin til baka nema því aðeins að ný ríkisstjórn taki við á allra næstu mánuðum sem Samfylkingin ætti ekki aðild að.

Í stað þess að hrekja nú á þessum tímapunkti frá flokknum evrópusinnaða hægrimenn - væri þá ekki réttara að bíða og sjá hverju aðildarviðræðurnar geta skilað okkur áður en við fellum okkar stóradóm

- á lýðræðislegan hátt að sjálfsögðu.

Þrengir ekki stöðu Sjálfstæðisflokksins

Vuvuzela flautan hefur áhrif

á heyrnina !

Kurteisi á kaffihúsi

Nýtrúlofað kærustupar kom inn á veitingahús og settist við borð. Þau horfðust innilega í augu og veittu því enga athygli þegar þjónninn kom að borðinu þeirra. Þegar þjónninn hafði staðið nokkuð lengi án þess að vera veitt eftirtekt, sagði ungi maðurinn allt í einu við unnustu sína:

- Þú ert svo falleg elskan mín, mig langar að éta þig.

Vilduð þér fá eitthvað að drekka með, spurði þjónninn kurteislega.

Bleik ský eða meinholl geðvonska

Ég hnaut um þessa skondnu frétt: 

Skaphundar heimsins geta nú tekið gleði sína segir Atli Steinn Guðmundsson fréttamaður hjá visir.is  Ástralir hafa fundið út að það ku vera hollt að vera í mjög vondu skapi annað slagið. Rannsóknin sýnir að fólk í vondu skapi tekur betur eftir umhverfi sínu og hugsar á gagnrýnni hátt en þeir sem svífa gegnum daginn á bleiku skýi með heimskulegt sæluglott á andlitinu.

Ljúflingar eru sagðir búa að jafnaði yfir meiri sköpunargáfu, vera samvinnuþýðari og almennt sveigjanlegri... Hrygga fólkið er sagt pennafærara... Neikvæðar hugsanir eru sagðar stórbæta minni fólks...

Og hvernig rannsaka sálfræðingar svona lagað? Rannsóknin er kynnt í nýjasta tölublaði Australian Science segir Atli Steinn og að nú skulum við bara muna það að þegar lífið er ömurlegt, þá gengur allt miklu betur.

Fréttin fylgir hér: